Volg allem treffen \
denn Starcken wiltw sie effen
wertt er So zuck
stich wertt er io zw Im Ruck
Ob er lanck ficht
So bistu kunstlich bericht
Glosa Merck die nachreÿsen soltẅ treibenn gegen den Starcken die da lanck vnd weitt vechten vnnd wollen sunst von rechter kunst nit halten
Item Gegen dem Schick dich also | leg dich gegen Ime In ein Hut legt er sich dan auch In ein | So merck eben wen Er sein swertt an sich zeucht vnd will Stechenn oder auff hebt vnnd will Schlagen | so volg Im bald nach mit dem ortt zw der nechsten plose Ee wen er Sticht oder den Slag verbringt Wirt Er dan des ansetzens gewar vnd versetzt aber weytt mit dem Swertt | vnd sucht an dir kein bloß mit dem ort So zuck aber durch vnd das zücken treib alweg | als offt er dir mit versatzung nach dem Swert sleitt damit kümstü auch zw denn arm bruchenn vnd zw andern Stückenn vnd das Ist die kunst die wider die lanck vechten zw dem Swertt vnd nicht zw dem mann
Das Ist der text vom Ansetzenn
Greifft Er auch sterck an
| das schiessen gesigt Im an
Glosa Merck wenn dir eyner hatt angesetzt vnd dich druckt | So stich In den tener der hand do Er das Swertt In der mit behelt oder hatt Er die hand vmbgewant so Stich von oben nider aber In die selbig hand
| oder stich In auff seynen arm
