Wiktenauer logo.png

Page:MS B.26 033v.png

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

EIn gar gut frantzoisch ringen wen dw zu ainem gest das er dich ergreifft bey der Mit vnd dich auff heben will so las dich heben und greiff Im mit deim lincken arm hinden vmb sein hals und fas In mit der selben handt bey der prust und heb in fast vnd schlah Im dein linckes pain zwischen sein pain vnd vmb wint Im sein rechtes pain mit deim lincken pain vnd fuss vnd truck vnd zeug In oben vast nider hintersich vnd wig mit deim pain vnd fuss sein Rechtes pain vast auf So muss er selber auf den Rucken vallen vnd auf welhe seitten er dich peugt das er dich maynt zu werffen so setz dein rechten ledigen fuss alweg für vnd lass dich darauf stossen So kan er dich nit werffen vnd peug In albeg oben vast nider vnd wig Im sein pain vnden vast auff / so muss er Ia vallen auch mit dem selben lincken pain das dw Im vmb sein rechts pain geschlag[e]n hast magstw woll greiffen auswentiss rechten halben vber das ander sein lincks pain vnd das auch vmb winten mit deim lincken pain vnd fuss vnd Im das auch starck auf wegen vnd oben nider Zu Ruck nider prechen so velt er auf sein Ruck


EIn gut englichs ringen mit fassen oder aus den armen fas ein mit deiner rechten handt oben vber sein lincke achssell hinten In das goller vnd mit deiner lincken handt vas Im sein rechten arm hinten bey seim ellenpog[e]n vnd las sein nit biss er velt vnd hab In gar vast vnd wen es dir eben sey so wurff dich vmb vnd las dein rechten arm vber sein kopff geen auf vnd vber sein rechte seiten vnd achssel vnd fas In mit rechtem arm vnd hant hinten In seim Ruck bey seim Wames oder der gurtll vnd heb In auf vnd In deim arm vmb gen vnd In dem fassen vnd heben das das als miteinander zu gee / So wirff dich vmb das dir dein rechte achssel vnd Ruck gen seim pauch stee vnd In dem vmb werffen vnd dem allen versetz In mit deim rechten pain euchwentiss hinter sein rechts pain vnd wig vnd zuck Im das pain gen dir vber sich aus mit deim pain vnd heb In in dem rucken starck auf vnd ker dich vmb auf dein rechte seiten vnd heb sein rechten arm starck vnd wurff In oben mit dem heben vnd winten mit dem fuss zucken an sein ruck so felst dw mit deim Rucken oder arss auf sein pauch