Item sticht einer von oben / so vnderfahr Im sein Rechten Arm mit ge¬kreutzigten henden das dein Linck oben sey vnd faß Im sein Rechten Arm mit deiner Lincken vnd stich Im in die hüfft oder vnder sein Rechten vchsen.
Item ihm zufechten nhim den dolchen In die mit vnd fahr von deiner Rechten vnden auff mit vberzwerchem dolchen starck durch / den andern stich ihm von deiner rechten ein mittelstich durch so khemstu In die Linck vnderhutt sticht er noch so nim mit dem knopf von dir auß vnd stich ihm lang noch vber sein Rechten von deiner Lincken zu seim kopf oder gesicht ⁋ Merck sthestu In der hutt vom tag / so stich ihm zum arm von oben nider es sey außwendig oder Inwendig Item sthestu in der hutt von vnden wo er dir oben zu sticht / so stich ihm mit deim dolchen von vnden entgegen In sein arm. ⁋
Item In was stuck dir dein Rechter arm erwischet wirdt es sey mit beiden oder einer handt / so schlag Im von vnden auff mit deinem lincken Arm von vnden auff starck In sein gelenck oder fal ihm außwendig / vber sein arm mit stossen / oder mit schlegen In sein gelenck oder greiff ihn ahn mit ringen. ⁋
