Bißher hastu nun gúnstiger liber Leser nit allein gehórt / auff was weis du mit den Háuwen deinen gegenpart angreiffen / sonder auch durch was mittel du im ferner in der Handtarbeit ohn dein schaden zůckommen mógest / Dieweil aber solches nit genug wo nit zům dritten ein gůter abzug gemacht wirt / will ich dir in volgenden Capitel von dem abzichen rechte vnd klare anleitung geben.
Von dem Abzug.
Cap. 6.
OB schon wie man sagt / wol haben angfangé / einen fast der halbe múhe in allen dingen entlediget / so mag doch gleichwol ein böses endt alles / so zůuor wol vnnd gůt gemacht / zů nicht machen vnd verderben / wie den teglich zůsehen / dises nun damit es nit auch dir im Fechten begegnet / das du nach dem du wol angriffen vnnd sicher nach getruckt hast / mit schanden auff die letz erst bestehst / welcher dann wol zůuerhüten / will ich dir alhie wie der Abzug soll beschehen / eigentlich erkleren.
Da dañ sonderlich wol zůmercken / das du nach einem jeglichen gefochtenen sinck auff diese drey weis immer můst abziehen / entweders zů ersten vordem gegenman / oder zů letzt nach im / oder anch zůgleich mit ihm. Wiltu vor jhm Abziehen so befleiß dich / das du ihn zůuor mit stucken der massen engstigest vñ aufftreibest / das er müß in die höch zůr beschützung fahren / in dem er dann wil ersehen was du ferner arbeiten wollest / so streich als bald mit dem abzug Hauw durch / vnd fahr hin weg ehe vnd dann ers gewahr wirt.
Wóllestu aber nach jhm Abziehen / so merck das diß auff zweyerley weiß mag beschehen / erstlich wan du wartest auff des Mans abzug / also wann er abhauwet / das du im listiglich ober=