Regiſter.
Hernacher uolgt das Regiſter, welchs alle Gewheren, wie die in diſem kůnst fechtbuch nacheinander gerichtet worden ſeind, Inn ſich haltend. U
.1. Das ſchwert iſt das uralt haůbtſtůck, darinnen aůch beỷ Jůden, haiden, unnd Chriſtenn, uil Ritterliche ůbůng, gehalten worden, Unnd noch heůttigis tags die maiſterſchafft dar., rinnen probiert wirt. Inn welichem .12 ſtend, mit allerlay abwechßlůng, brůchenn unnd hãŵ, nach dem Kůnſtlichisſen, mit Poſſen unnd ſchrifften begriffen seind,
.2. Der Tůſſegk, welchen die alten meſſer genant haben, Unnd ſich das redlich Uolck die Spartaner deſſen uaſt gebraůcht, unnd dardůrch groſſe Eer eingelegt haben, hat ſchriftlich und mitt poſſen .44. ſtend in ſich halten.,
3. Das Stennglin hat seinen vrsprůng von den Römern vnnd Persiern · wirt an Stat der Schefftlin gebraůcht · hatt gar gůter stend · 18 · Inn Im begriffen ·
4. Der lanng spieß der Zeit ain prächtlich Fechten · aber an den Jaren nit vast allt · hat Inn Im · 12 · stůckh ·
.5. Die hellenparten · gar ain allte whor · haben die Kriegsweiber · so man Amatzones genennt hatt · erstlich erfůnden · Ist mit · 20 · gůten stenden geschriben vnnd possiert worden ·
.6. Es haben · die allten ain kůnst des Fechtens mit der Segens gehallten · hat aůch sein besondere versatzůng vnnd vortail · hatt stennd Inn Ir wie gsehen wirt · 10 ·
7. Noch ist ain allten Gewhör · welliche die Sarmati · hůnos vnnd andre vůlcker vor Jaren gebraůcht haben · der Trischel genannt · hellt Inn Im · 8 · stůckh begriffen ·
8. Die Baůrstang Ist ain gewhör Inn der not · nicht das ainer dardůrch das leben verliere · aber zů ainer gögenwhor tröstlich · hellt Inn Ir · 8 · stůckh
9. Item whör gögen whör · als da ainer den andern etwann vngewarnet oder vnůersehens ÿbereilt · gar ernstlich vnnd gůt · hellt Inn Im · 12 · stůckh ·
.10. Deßgleÿchen Inn der Sichel aůch · weliches Fechten bis In · 16 · stůckh mit sich bringt ·
