Page:Der Allten Fechter gründtliche Kunst (Christian Egenolff) 1531-1537.pdf/33

XIIII v Zwir häw brechen. Wann du stehest in der Hut von tach, und einer auff dich hawet mit der Zwir, so haw den Zornhaw gleich mit ihm ein, unnd bind ihm starck mitten auff sein schwerdt, Und will er umbschlahen mit der Zwir, so zwirch ihm vorn zu seinem hals. Auch magstu alle stuck treiben, als in dem Streichen. Beschluß des langen Schwerdts. Wer wol bricht, Und endtlich bericht, Bricht besunder, Jeglichs in drei wunder. Wer recht wol hengt, Und winden recht mitt brengt, Und winden achtet, Mit rechten sinnen betrachtet, Und so ihr eine, Der winden selb trit ich meyne, So sind ihr zweintzig Und vier, zäl sie eintzig, Von baiden seitten, Acht winden, damit ler streiten, Brüff die gferte, Weych oder hertte. Zu dem kurtzen Schwerdt. Das kurtz schwerdt dich bericht, Wer gegen dir sticht, Mit deinem schilt, Wiltu einen machen milt, Fünff ler, Die mit rechten sinnen ker, Zwen auff der rechten, Darmit ler fechten, Sovil auff der lincken, Schick dich nit einwencken, Und vor einem Laß dir nit vermeynen. Ist einer oben, Bleib unden, thu ich loben. Mit deinem schilt lern absetzen, Wind ein, wilt meister letzen Leßt er das, Greif zwischen die beyn, nit laß. Trit bricht, Was man macht, er zunicht. Ob er dir oben remt, Greiff schwert, far in die mit, der würdt beschemt. Durch