Das ist wenn du dein glefen verschossen hast behelt er denn die sein so nim gar eben war wie er sie gefast hab ob er den ort lanck oder kurtz fur sein vorgesetzte hant last furgenn vnnd ob er dir oben oder vnden domit wil zu stechn
Hie merck das stuck
Wenn du hast ein schwert vnd er ein glefen hat er sie dann kurtz gefast vnd stelt sich domit in die ober hut, so leg dein schwert auf dein lincks knie, in die hut, sticht er dir denn oben ein zum gesicht, so var auff vnd versetz den stich mit dem schwert fur deiner lincken hant, gegen seyner rechten seiten, vnd var domit auf an seyner glefen in die ober hut vnd spring zu im vnd setz im an, triffestu in dan nit recht mit dem ansatz, so las dein sctwert zu hant fallen, vnd eill zu im vnd wart der ringen.
Aber ein Stuck
Wenn du wilt ein schwert vnnd er ein Glefen, stet er dann domit gegen dir in der vnntern huet, vnd
