| 1r - 3r
|
No Translation 
|
Transcription
by Michael Chidester
|
|
|
[1r] Der Allten Fechter gründtliche Kunst. Mitsampt verborgenen heymlicheyten, Kämpffens, Ringens Werffens &c. Figürlich fürgemalet, Bißher nie ann tag kommen.
|
|
|
[2r.1] Vorred an den Leser.
Das die rechte Kunst der Fechterei, ein alte freie kunnst,
bei unsern vorfaren in grosser achtung unnd ernstlichem[!]
gebrauch ghalten, ist auß vilen Monumenten wol kundt. Aber
eygentlich nit so ein eitel gauckel werck, wie bei etzlichen den unseren
gsehen, odder ein flegel fechten, welichs anderen viler beste
stuck (wie sie es nennen) so sie on alle kunst, nur mit zugethanen
augen, als von den Andabathern gesagt würdt, drein schlahenn.
Daher geschichts auch das solche zu vil malen mit ihrer kunst, je
dermann zu spot kommen, und deren (Ich red von etzlichen) gar selten
einer, ungelämet oder unverhönt, eins rechten tods abstirbt.
|
|
|
[2r.2] Es gschicht aber diser theuren kunst, gleich wie allen rechten
künsten und gaben Gottes, dweil sie ein jeder nach seinem kopffe
glosieren, meystern und zurstücklen wil, das schir der recht grund
und gebrauch gar erloschen.
|
|
|
[2r.3] Es ist bei den Altenn, fürnemlich den Römeren, ein Fechten
gewesen, gmeynlich uff freyden tagen, Festen unnd anderen
versamlungen, nur von eygnen knechten und bösen knaben, gehalten,
da es weder krentzlin noch meyster rur, sonder kopff und kugel
golten, kein ander scheydts man dann der todt zugegeben worden.
|
|
|
[2r.4] Zum andern dweil je kein Zucht oder Leermeyster sogscheide,
und in Summa, nit müglich, das die brünstige Jugent, als
bald on Kindtheit, zu ernstlichen Sachen bracht, und die hitzigen,
freydigen, geylen affect benommen werden mögen, Haben
sei dise kunst, als ein leiblich Exercitation und übung, den Jungen
in sonderheit, wie noch augenschein, fast anmüttig, damitt
sie auch zu allem ihrem thun und handel, vil destogeschickter und [2v.1] hurtiger werden, fürgenommen, In aller hand wehren, und on,
zu roß und fuß, wasser unnd land, wie desselbigen vilfaltige anzeygungen
hinder ihnen verlassen, underweiset.
|
|
|
[2v.2] Und dieweil sie ihrer Jugent, gar fleissig auffsehen, wie dann
hoch von nöten, und in alle weg grosse acht gehabt, Nit so jämerlich,
on alle underweisung und lere versaumpt, unnd uffwachsen
lassen, Wie zu unsern zeitten (leyder) vil gesehen würdt, die wir
unsere Kinder anfenglich in allem mutwill, üppigkeit und faulheit
erziehen, Einig und endtlich nur in müssiggang, zu allen geschwinden
finantzen, beschiß und wucher, wider Gott und den
nähsten, abrichtenn. So haben sie hiemit nit alleyn underweisung,
sich des feinds im Veld, mit der hand zu erwehren angezeyget,
sonder auch damit dem gmüt ein wesenlich, gschickliche Institution,
bescheydenlichen handels und wandels, in andern sachen,
gegen den leutten, und in allem leben, den begirden zu widerstehn
&c. ingebildet. Als nämlich (das ich auß vilen etwas melde)
So sie gelert, Dir sei In deß, das Vor und Nach, Zulernen
Schwech unnd Stercke gach, Haben sie dabei zuverstehn
geben und underweiset, das vil gelegen an einr bequämen zeit, in
in[!] allen geschäfften, Und der gröst schad, solche zeit In des, unfruchtbarlich
versaumen und hingeen lassen. Also auch so mann
bei ehr und gut ist, und das vor glückseliglich hat, acht haben solch
es zubehalten, damit man nit endtlich mit schanden auß dem Vor
ins Nach sehen komme. Dergleichen Sterck durch schweche erkennen,
bezeychnet das nit eins jeden glatten wortten und freuntlichen
erzeygen zuglauben, sonder des hinderlists dabei warnemen.
|
|
|
[2v.3] Mit weych hert brechen haben sie geleret, dabei erinneret, nit
böß mit bösem zu empfahen, sonder, das gegen einem zornigenn
mit gütte mehr außgericht werde. Herwiderumb. Der stets
versetzt, Würdt offt geletzt, Gibt zuverstehn, das gegen etzlichen [3r.1]
|
|
